入行做物理治療助理　從扶抱轉移技巧學起

老人家年紀大機器壞，稍有不慎便好易受傷，加上患上中風的機會較大，影響活動能力，需透過物理治療協助患者恢復身體功能。

社會上人口老化問題愈來愈嚴重，因此對於護理行業人手需求也愈來愈大。

有志入行成為物理治療助理的人士，可選擇報讀仁愛堂的物理治療助理證書課程，有助學員掌握基本醫護知識、儀器應用及行業概況等。

課程由擁有 9年教學經驗的物理治療師 Max任教，課程分為 3部分，「第一部分係學習人體解剖學，認識基本生物學；第二係理論部分，學習中風及各種痛症處理；最後係實務部分，教授輪椅過床技巧，使用各種助行工具、扶抱及轉移技巧。」

跟指引照顧病人

物理治療助理需根據物理治療師的指引照顧病人， Max說：「我哋大部分時間都要接觸行動不便嘅患者，例如幫中風病人着衫；亦會經常照顧老人家，佢哋嘅能力弱，如果唔小心用錯力，做伸展運動會好易甩骹；有時仲要訓練家傭照顧老人家，包括扶抱及轉移嘅動作。另外，我哋好重視喺心理上嘅照顧，學員要學習同老人家相處，說話句子要簡短，一句起兩句止，令老人家容易接收到訊息。」

3點要注意

Max表示物理治療助理在照顧病人時有 3點要注意，分別是預防措施、禁忌症及適用症。「預防措施即使用任何復康設施前，要先檢查有冇損壞，例如助行架有冇鬆脫，甚至檢查老人家有冇着好條褲，避免做緊治療時甩褲發生意外。禁忌症即要留意病人嘅病歷紀錄，若病人有骨折或其他痛症就唔適宜做伸展運動。最後，適用症就係因應嘅病人能力及情況，揀適合嘅復康設施。」

學員需接受筆試及實務試，才獲頒發證書，若學員不合格可進行一次補考。修畢課程後，學員可選擇投身護理行業，成為物理治療助理，起薪點約$11,000起，「學員可以到 NGO，例如仁愛堂、東華三院做助理，或到私人診所及政府老人院工作。」

點扶病人下床？

Max表示物理治療助理經常要扶病人下床，切忌使用蠻力，「先將病人一邊腳提起，手放肚上。」

導師 Max
現時學員約 30至 40歲女士為主，有部分學員本身已有正職，因物理治療助理工時穩定，返 9朝晚 5，所以嚟上堂諗住轉行。另外，護理行業睇重經驗，若學員未接觸過相關行業，可先做 part time拎經驗，再轉做 full time。

學員 Michelle
我從事護理行業，因為公司要求，所以嚟報讀呢個證書課程。課堂上嘅內容好實用，例如學到點幫助殘障人士做伸展運動及落床嘅技巧，明白做物理治療助理要好細心，做任何動作時要多加留意。

課程：物理治療助理證書課程
機構：仁愛堂 YES專業進修課程
地點：深水埗長沙灣道 202至 204號瑞星商業大樓 6樓
日期： 16/6至 25/8（逢星期五）
堂數： 10堂，共 25小時。
費用：$2,780.00
內容：物理治療理念、物理治療助理職責、基礎人體生理學及解剖學、常見神經科疾病（中風、柏金遜症）復康、常見痛症處理方法、扶抱及轉移技巧、學習使用助行工具、輪椅檢查及操作。
查詢： 2155-3809 / 2155-2068