帶八旬父母　反轉地球

黃威  37歲。他一人帶着需坐輪椅近八旬的雙親，自由行遊歷全球50多個城市，去巴黎學煮法國菜，睇西安兵馬俑。他最近出工具書，教人怎樣帶長者外遊。

雙親行動不便，我們去旅行要包車，交通費是最大開支。 試過在德國包一日的士，車費600歐羅，即是7千2百蚊港紙。錢，還是其次。老人家大小二便頻密，每隔個多小時就有需要。外國不易找公廁，問餐廳借亦難，我惟有去café 叫杯咖啡為名，方便父母上廁所為實。 一日起碼去幾次，我每日坐底飲3杯咖啡，所以我全程都會好精神。

除了久不久就要坐低唞，上午玩完一趟就要返酒店叉足電，才有精神再出去走。表面上一日遊6個鐘，七除八扣其實玩得3個鐘。

人生無得plan
父母退休前，一個是公務員， 一個是秘書，兩個做人都好有計劃，婚後考慮好耐，到40歲才生我一粒仔，即使跟團去旅行咁小事，開茶會會問好多問題，旅行前一星期已經執定行李。他們還一早儲定錢，預計我萬一在香港讀唔到書，就送我出國。
結果，我考到中大的會計系。父母即放下心頭大石，我中七都未讀完，他們已決定提早退休嘆世界。但人生，好多時都無得plan。

有朝我瞓醒起身，見爸爸暈倒在客廳，媽媽慌張打999。他中咗風，左邊身失去8成活動能力。當時他只係退休幾個月，而我仲放緊暑假等入U。

由手術到物理治療，由坐輪椅到揸拐杖行路，花了兩年時間。我大學畢業到會計師樓實習不久，媽媽突然患上黃斑點病變，手術失敗，左眼失明。此後，父母的活動範圍只限於樓下公園和街市，出中環睇醫生，對他倆來說已是莫大挑戰。02年有一晚，睡在牀上的爸爸哭着跟我說，滿以為我大個仔，他退休後就可以環遊四海，沒想到跟坐監無分別。記得小時候，父母一放工便回家，好少有自己生活，即使暑假去旅行，都是去我喜歡的廸士尼，所以我小學已經去勻全球的廸士尼。

我決定帶他們去旅行，走遍世界每個角落，圓他們的夢。

蝦碌自由行
因為行動不便，若跟旅行團去，20分鐘自由時間就已花了15分鐘去廁所，要團友等父母更過意不去，所以我決定自由行 。
從來都是他們照顧我，我咁大個仔，第一次一人拖住兩個喼加兩老出發。起初多蝦碌，搭飛機唔識安排他們坐最前一行及路口位，方便他們去廁所。爸爸更試過因要拉着前面座椅椅背借力站起來，連前面乘客個假髮都扯甩咗。

我也不會衡量他們的體力。有次以為由台北Grand Hyatt 行去101好近，卻原來兩三個街口的路程，對他們來說已很吃力。 有次去英國睇球賽，個波一近龍門，全場觀眾企晒起身睇入波，但兩老起唔切，結果全場射入十球，他們一球都睇唔到。

十多年了，我總算掌握到跟他們去旅行的步伐。明白他們遊景點，必須龜速，但我自己想去的，就要極速。像上次去土耳其聖蘇菲亞大教堂，兩老上唔到頂層，我先安頓好他們，再自己30分鐘快上快落睇景。有時跟女友同行，趁他們酒店午睡，我們才竄去shopping。由起初三天上海遊都好甩轆，到今日廿日歐遊，也應付自如。

好多年輕人嫌跟父母去旅行麻煩，跟年邁父母去旅行的確唔容易，卻又是我最大的福氣。

老友記同行手冊
黃威說，跟長者旅行，有以下幾點須注意：
1. 旅程別超過廿日：根據他經驗，過廿日長者機能會開始出問題。超過6小時機程應在中途站停兩日。
2.不宜低溫：氣溫低過十度的地方避免去，因心肺及皮膚會難適應。
3. 坐近廁所位：搭飛機沒必要選商務位，能伸長的座椅對長者無用，因他們須坐直對腰背才好。機位盡量揀近廁所的第一行，較闊落和方便出入。
4. 酒店要高級：寧願揀高級酒店住最平價的房間，因為設施較好，尤其到落後地方旅行，可問酒店借輪椅外遊。
5. 最好包車：無嘢貴得過住酒店，為省時和減少父母勞累，寧願包車點對點，另坐郵輪或火車也是不錯選擇。