不死鳥．蘇樺偉

一念之差，蘇樺偉可能已經死了。
故事源於廿九年前廣州的一所醫院：一個落地呱呱的嬰兒被發現患上黃疸病，徘徊生死邊緣。
醫生的專業建議，是與其救活一個殘障兒，不如趁年輕，生個健康的吧。
年輕父母流淚，猶豫，終於嚥下一口氣，咬緊牙關將孩子從死神手中搶回來。
後遺症是孩子終身受痙攣和弱聽之苦。
 
廿九年過去，那家人果真養活了一個殘障兒，卻成就了百年難得一遇的短跑奇才。
傳說世上有種不死鳥，能於灰燼裡重生，且翱翔天際。
蘇樺偉，大概就是這只先死後生的鳥。
 
眼前這位即將告別二字頭的男生手執iPhone 4，閒來喜歡上網，間中會偷偷打機至三更半夜、有追看《狐忍》和儲figures的習慣……與時下年青人無異。
 
「唔係跑步，根本無人會認識蘇樺偉。」

由十五歲踏足國際賽場至今，蘇樺偉奪得廿六面金牌，包括七次世錦賽冠軍、六次奧運冠軍，還五度打破世界紀錄，是公認是一代跑步奇才。

但回到廿九年前，應該沒有人相信蘇樺偉能成為家傳戶曉的運動員。
 
甫出生，就被斷定患上黃疸病。經搶救後，黃疸上腦，導致腦部受損。醫生主張放棄，但蘇家決定堅持，日花三百元買藥保命，終於將他在死亡邊緣拉回來。後遺症是痙攣、嚴重弱聽、腦痲痺，引致口齒不清和學習障礙，亦因此容易令人誤會他有智力問題。
 
「有啲小朋友一出世就要坐輪椅，都唔會畀人歧視啦。
 
「我只不過係受病嘅影響。
 
「我從來唔覺得人哋歧視我，我覺得自己和正常人無分別。」
 
痙攣令蘇樺偉肌肉不協調和四肢力量不足。別家的小孩一歲懂行，他卻四歲才踏出第一步。整個幼稚園階段，他也忙於接受物理治療，訓練大腿肌肉和改善步行技巧。
 
起步比人遲，不代表走得比人慢。經過一輪特訓後，昔日幾乎是活在媽媽肩背上的他，變身活躍分子。小一就被挑中參加SAP（香港傷殘人士體育會；後改名為香港殘疾人奧委會暨傷殘人士體育協會）與七間特殊學校合辦的運動會，且場上未逢敵手，贏得「長勝將軍」的外號。更有同學向老師要求不和他同場比賽。
 
跑步天賦，大概是家族遺傳的。蘇樺偉的堂弟是本地籃球班霸永倫的球員蘇伊俊，蘇媽媽年青時亦是跑手。
 
「應該係媽媽遺傳，佢以前喺大陸，喺類似省隊裡面受訓……總之唔係好叻啦。
「依家佢都有跑架，減肥吖嘛，哈哈。
 
「不過先天好，都要靠教練和自己嘅努力。」
 
振翅高飛
 
十三歲那年，在一場跑步比賽後，港隊教練潘健侶和蔡喜逢邀請他加入SAP會接受系統性訓練。媽媽咨詢過老師的意見後，決定給他一個發展機會。
 
上訓練班，正好適合蘇樺偉好動開朗的性格。大伙兒嘻嘻哈哈的學跑步學拉筋，似聚會多於練習。直至一天，他被挑中加入港隊，備戰阿特蘭大殘奧。
 
「阿Sir就咁話，『你聽日跟潘Sir練啦！』我心諗，大佬，咩事先！」
 
 對當時的他來說，訓練班和港隊，是天堂和地獄的分別。
「最細嗰個都大我十二年，好有代溝。
「訓練好辛苦，啲人又認真，唔會講笑。
「我覺得好唔開心，好想返訓練班。唔肯認真練習，又成日偷懶，或者走去同人傾計。
「教練話跑三個圈，我就拗跑兩個圈。講價失敗，咪跑兩個，行一個囉。」
他想離開，目標直指奧運獎牌的隊友們也恨不得他立即離開，奈何接力隊三缺一，沒有選擇的餘地。
 
終於，貌合神離的一行人到了阿特蘭大殘奧。那年，他只有十五歲。
「都唔知咩叫奧運，只知有好多可樂飲！」
他負責4X100米的最後一棒──原因不是他快，而是因為大家對他沒有期望。
「跑完之後，祥哥（負責第一棒）過嚟問我跑第幾。我答，第一囉。
 
「佢哋好開心，而我就只係跑到無晒氣，好攰，好想返去休息。
 
「點知贏咗要繞場一週！嘩，唔係嘛，仲嚟多個400米？」
胡里胡塗奪得奧運金牌，不明白，也不珍惜，他依然是個貪玩愛偷懶的小伙子，直至摘下第一面個人金牌。
「原來努力練就可以拎到金牌。
 
「慢慢由100米，跑埋200米，到400米，仲破埋紀錄。
「不停練不停練，跑步變得越來越重要。
「無意識下鍾意咗跑步。」
 
四年後的殘奧會，他報名參加100米、200米、400米、4X100米和4X400米。100米、200米和400米，他都以破世界紀錄的姿態封王。接著，又和隊友奪得4X400銅牌。正當他收拾心情，準備最後一項比賽，4X100米初賽之時，他開始嘔──因比賽過度引起身體不適。
 
「真係好印象深刻，跑到嘔！
 
「無諗過唔跑。4X100係有機會拎牌架，一定要搏一搏。」
2000年悉尼殘奧會，蘇樺偉贏得三金兩銅，「神奇小子」一名不逕而走。
不死鳥終於振翅高飛。

住公屋的奧運冠軍

2000年悉尼殘奧會後，蘇樺偉可說踏入運動員生涯的黃金期。無論是殘奧、世錦賽、世室賽等國際賽事，都能輕易地在頒獎台的冠軍位置找到他的身影。哪知，原來有樣東西比成為世界冠軍的難度還高，兩個字──「搵食」。
 
作為家庭經濟支柱的蘇爸爸在2002年因工傷被提早退休，住公屋的一家四口只能依靠政府每月發放的$3,000殘障運動員津貼和積蓄過活。2004年奪得雅典殘奧的一金後，蘇媽媽終於向他提出，放棄跑步，投身社會。
 
「唔捨得都要。我係大仔，必須支持屋企。
 
「阿Sir講過，佢都想跑步，但為咗搵食，最終都放棄咗。」

在香港，當運動員難，當殘疾運動員更難。被批為精英甲級運動員的桌球好手傅家俊，每月可獲得二萬多元的資助，而六次奧運冠軍蘇樺偉，卻只有數千元津貼；由2012年倫敦奧運開始，健全運動員奪得奧運金牌可獲三百萬獎金，殘障運動員奪得殘奧金牌就只有三十萬獎金。同樣是奧運金牌，待遇卻差天共地。

正當蘇樺偉認命，打算扛起家庭重擔，從此與跑步絕緣時，竟然收到意想不到的消息──藝人劉德華主動給他一個機會，且條件優厚：容許他每星期三天提早下班受訓、因比賽或出席活動而請假，不會扣人工、參加大賽，還能停職留薪和獲得額外津貼。

「作為傷殘運動員，我好好運，有很多人幫。」

有了穩定的收入，蘇樺偉再無後顧之憂，真正踏入運動員生涯的高峰。2006年，他在荷蘭世錦賽、吉隆坡遠東及南太平洋區殘運會和瑞典世室田徑賽中，一共奪得五面金牌。2007年，他又摘下全運會和日本田徑錦標賽的三面金牌。

跑了十多個年頭，理應視比賽壓力於浮雲。誰不知2008北京殘奧會，卻老馬失蹄。在主場之利、知名度漸高，加上「劉德華效應」的影響下，蘇樺偉在賽前備受注目。沉重壓力令他慘遭滑鐵盧：原定目標是三金，結果100米賽事僅得第三，400米更只有第六。最後希望都押注在200米賽事上。

「所有對手都會諗拎第一，無人會諗拎第二第三。」

「如果諗自己會輸，就無可能贏。」

結果，他戰勝陰霾，戲劇性地奪得冠軍，還刷新世界紀錄。頒獎時，鳥巢內響起《中國人》的音樂，全場九萬人齊聲和唱，令他哭成淚人，是永誌難忘的一幕。

跑了十四年，參加過四次奧運。以短跑運動員來說，是老將一名，退役只是遲早的事。
「所有大賽，所有獎牌都拎過晒。
「個人覺得，輸贏都唔再重要。畢竟也差不多年紀了……
「跑步，依家係興趣，係身體健康。
「如果當日無開始跑步，我諗我仲係嗰個好懶嘅人，今日可能緊做份文職，甚至係搬貨。
「唔係跑步，根本無人會認識蘇樺偉。蘇樺偉只會著一個平凡人生。」
 
Profile

蘇樺偉
1996             
第一屆傷殘人士運動會
男子4x100米接力   金牌
 
阿特蘭大傷殘人士奧運會
男子4x100米接力（T35-38級）   金牌
1998年
英國伯明罕傷殘人士世界田徑錦標賽
男子4x100米接力（T35-38級）   金牌
男子100米（T36級）金牌
男子200米（T36級）金牌
 
2000年
雪梨傷殘人士奧運會
男子100米（T36級）金牌
男子200米（T36級）金牌
男子400米（T36級）金牌
男子4x100米接力（T35-38級）銅牌
男子4x400米接力（T35-38級）銅牌
 
2004年
雅典傷殘人士奧運會
男子100米（T36級）金牌
 
2007年
日本殘疾人士田徑錦標賽
男子100米（T36級）金牌2007年(12.15秒)
男子200米（T36級）金牌
 
2008年
北京傷殘人士奧運會
男子100米（T36級）銅牌
男子200米（T36級）金牌