中年發光全力扣殺 傷殘靠意志為港爭光

浩源的隊友、今年廿七歲的王鎮炎（Tim），由讀幼稚園開始，排隊永遠排頭位，但他不覺自己的侏儒症是種殘障。他因反應比人快，打羽毛球有一手，入過校隊打學界，但始終輸多贏少，左撲右撲都拎唔到獎。

一次他在街場打波，遇上一個前港隊球員：「佢問我：『知唔知你呢個身形，係特別有個比賽組別？」球員鼓勵他加入傷殘羽毛球隊，他初聽「傷殘」二字，感覺既陌生又突兀，但基於好奇心，Tim很快就決定去體院一試身手。
Tim原本只打算玩玩吓：「後來發現自己同世界水平唔係差好遠，呢份滿足感好難形容。」成為港隊唯一的侏儒球手，他的飛撲從此更有價值，更在去年全國運動會奪冠，現時單打世界排名第五。

經常出動做球探、因小兒麻痺症導致行動不便的港隊教練曾昭邦指，傷殘羽毛球員面對最大問題，是缺乏水平相近的對練隊友：「搵人真係好難，好多人只係當興趣班，打兩下就中途離開。加上唔可以全職打，大家睇唔到前景，更難付出心機。」
港隊現有約十名隊員，現年五十五歲、患有小兒麻痺的吳麗玲（單打世界排名第七）是唯一女將。國際傷殘羽毛球賽，按球員殘障和嚴重程度分組別，包括：兩個輪椅組、兩個下肢殘障站立組、一個上肢殘障組、一個侏儒組。傷殘羽毛球運動員至四十歲仍屬當打之年，人到中年，依然能夠和戰車一路殺敵。