m18講場：領展員工點解要學坐輪椅？

平日出街要行樓梯，對大部分人嚟講好普通，但對殘疾人士嚟講，5厘米石級仔都可以係重大障礙。香港傷殘青年協會最近就為領展房地產投資信託基金嘅員工同商戶，搞咗個無障礙大使訓練，兩場訓練總共有50人出席。

3位導師本身都係輪椅使用者，佢哋分組帶學員以輪椅代步，去樂富廣場不同店舖扮買嘢或嘗試用社區設施，親身感受一下傷殘人士日常生活。令大家更明白傷殘人士嘅需要，知道點樣可以正確協助佢哋。

其實傷殘又點止坐輪椅一樣呢？10月8日領展就喺樂富廣場A區，邀請大家免費試吓以無障設施為主題嘅體驗，代入視障、聽障等角色去完成任務，仲有禮品送架。